Instituti Demokratik i Kosovës (KDI) ka publikuar “Indeksin e perceptimit të korrupsionit 2017”, i përgatitur nga Transparency International ku thuhet se Kosova ka shënuar progres në luftimin e korrupsionit. Majlinda Kurti, koordinatore e projektit në KDI tha se Kosova ka shënuar progres të lehtë në luftën kundër korrupsionit.

“Ka më shumë se 20 vite që Transparency International e bënë vlersimin  për vendet e botës. Në vitin 2016 Kosova ka qenë  me 36 pikë, kurse në vitin 2017 ka arritur në 39 pikë. Kosova është radhitur në vendin e 85. Pra në vitin 2016 ka qenë në vendin e 95 dhe ka përmirësim në këtë drejtim”,  tha ajo sot në emisionin e mëngjesit në Radio Televizionin e Kosovës (RTK).

Kurse Florent Spahija këshilltar ligjor në KDI, vlerësoi se në Kosovë është vlerësuar depolitizim i KGjK-së. “Ka pasur vlerësime dhe për gazetarinë në Kosovë, çdo ditë në mediat tona ka tema dhe për këtë ka pasur vlerësim”, tha ai sot në emisionin e mëngjesit “Mirëmëngjesi Kosovë”, në Radio Televizionin e Kosovës (RTK).

Ndryshe sipas Transparency International Kosova është i vetmi vend në rajon i cili ka shënuar progres. Shqipëria ka rënie prej një pike, gjithashtu edhe Serbia dhe Mali i Zi. Maqedonia është rasti më shqetësues në rajon që vetëm për 3 vite ka rënë për 10 pikë. Janë tre fusha që është shënuar progres, fusha e pavarësisë së gjyqësorit, fuqizimi i medieve dhe lufta kundër korrupsionit./RTK/